Иттердегі буаздық және күшіктеу кезіндегі асқынулар

Әдетте, иттердің буаздық кезеңі бірқалыпты және қиындықсыз өтеді, бірақ жақсы көретін әрі қамқор қожайын ретінде сіз үшін де, үй жануарыңыз үшін де осы бір қызықты уақытта қандай мазасыздық белгілеріне ерекше назар аудару керектігі туралы білудің еш зияны жоқ. Сонымен қатар күшіктеген кезде итіңізде қандай асқынулардың болуы мүмкін екендігі туралы нақты түсінігіңіз болуы керек.

Иттердің күшіктеуі кезінде қандай жағдайларға ерекше көңіл бөлу керек?

Әдетте, иттердің буаздық кезеңі жеңіл және қиындықсыз өтеді, бірақ жақсы көретін әрі қамқор қожайын ретінде ықтимал, дегенмен, ықтималдылығы аз асқынуларды білдіретін кейбір белгілерді біліп алған жөн. Есіңізде болсын: келесі жағдайларда ветеринар дәрігермен хабарласуыңыз керек.

Буаз итіңіз тамақтанудан бас тартқан немесе өзін нашар сезініп жатқанын басқа жолмен сездірген жағдайда. Есіңізде болсын, иттер көбінесе буаздықтың шамамен 30-шы күнінде, сондай-ақ күшіктеу алдында тәбетін жоғалтады, бірақ осыған қарамастан, үй жануарыңыздың жалпы әл-ауқаты нашарламауы керек.

Егер қалыпты емес, оның ішінде қан араласқан және иісі жаман қынаптық шығындылар байқалған жағдайда.
Үй жануарыңыз өзін нашар, жабырқаңқы сезінген, қыңсылаған және бір жері ауырып тұрғандай сезімде болған жағдайда.
Егер буаз болған кезде түсік тастаған жағдайда.
Болжалды ұрықтанған сәттен бастап 70 күн өткен соң да күшіктемей жатқан жағдайда..

Буаздық кезіндегі асқыну белгілері

Әдетте, адамдардың босануына қарағанда иттер әлдеқайда жеңіл әрі оңай күшіктейді. Сонымен қатар біздің төрт аяқты достарымыз көбінесе бөтендердің көмегінсіз, өз беттерінше күшіктейді. Алайда, күшіктеу кезінде сирек болса да, асқынулардың болып тұратынын ескерген жөн. Есіңізде болсын: келесі жағдайларда міндетті түрде ветеринар дәрігермен хабарласуыңыз керек.

Күшіктеудің алдында температурасы төмендегеннен кейін 24 сағат өткен соң ит тумаған жағдайда. Дене температурасының төмендеуі күшіктердің туылуға дайын екенін көрсетеді. Тиісінше, егер олар шықпай жатса, онда үй жануарыңызға медициналық көмек қажет болуы мүмкін.
20-30 минут ішінде болған қатты толғаққа қарамастан, күшік туылмаған жағдайда. Мұндай жағдайда дереу дәрігермен хабарласыңыз және ветеринарлық емханаға барсаңыз, туылған күшіктерді өзіңізбен бірге алып баруға дайын болыңыз.
Жасыл немесе қызыл-қоңыр қынаптық шығынды пайда болғаннан кейін 4 сағат өткен соң күшік туылмаған жағдайда (2 сағаттан кейін ветеринарға қоңырау шалуға дайын болыңыз)
Келесі күшік туылғаннан кейін, ит екі сағаттан астам уақыт демалып немесе аздап күшеніп жатқан, бірақ басқа күшіктер туылмай жатқан жағдайда, ал сіз күшіктердің бәрі әлі шығып болмағанын білген жағдайда.
Жарыққа шығып келе жатқан күшікті көрсеңіз, бірақ иттің барлық күш-қуатына қарамастан, күшік толығымен шыға алмай жатқан жағдайда.
Егер күшіктеудің екінші кезеңі (яғни, күшіктердің тікелей туылуы) 12 сағаттан астам уақытқа созылған жағдайда.

Күшіктегеннен кейінгі асқыну белгілері

Сонымен сүйікті үй жануарыңыз керемет әрі сүйкімді күшіктерді туды-ау! Алақай! Бұл сіздің итіңіз үшін ғана емес, сіз үшін де ең бақытты кезең болуы керек. Алайда, сақ болыңыз, өйткені белгілі бір медициналық проблемалар мен асқынулар босанғаннан кейін де пайда болуы мүмкін, сондықтан итіңізге мұқият қарап, келесі жағдайларда ветеринар дәрігерге хабарласыңыз.

Жолдасы түгел шықпаған жағдайда (күшік қанша болса, олар да сонша болуы керек).
Үй жануарыңыздан ашулану, мазасыздану белгілері байқалған жағдайда. Сонымен қатар өте алаңдатарлық белгілер – құрысулар, сондай-ақ үй жануарларыңыздың епсіз қозғалысы. Есіңізде болсын: бұл белгілер иттің организмінде кальций тапшылығының (гипокальциемия) бар екенін көрсетуі мүмкін.
Итіңіз өзін нашар сезінген және келесі белгілер байқалған жағдайда: температураның көтерілуі, тәбеттің жоғалуы және күшіктерге немқұрайлы қарау. Бұл белгілердің бәрі жатырда инфекцияның бар екенін білдіруі мүмкін.
Итіңіз тіпті, барлық күшіктерді туғаннан кейін де күшенуін жалғастырған жағдайда.